Un viaxe sensorial pel mundu de la sidra.
N’Asturies, la sidra ye muncho más qu’una bebida: ye una forma d’entender la vida. Ta tan presente nel día a día del territoriu que la so cultura sidrera ye Patrimoniu Cultural Inmaterial de la Humanidá. Lo que lo fai único ye un conxuntu de tradiciones que namás se viven nesti sitiu: dende l’escanciáu (esi xestu tan característicu de llevantar el brazu y dexar caer la sidra en vasu pa qu’espalme) hasta les espiches (fiestes populares que se celebren en llagares o sidreríes), los amagüestos (celebraciones serondiegues nes que se toma sidra del duernu y castañes) o los chigres, les sidreríes tradicionales asturianes, siempre llenos de vida y conversación.
Too esto acompáñase d’un vocabulariu propiu y bayurosu, que conserva una tradición tresmitida de xeneración en xeneración. La sidra con DOP Sidra d’Asturies ellabórase de forma natural, con mazana autóctono y métodos tradicionales. Tou esti paisaxe ye parte fundamental de la identidá asturiana.
Quien visita Asturies adiéntrase nun mundu sidreru auténticu, vivu y con un raigañu fonderu nel ADN de la so xente.
La reivindicación de la mazana y la sidra gallego
La producción y el consumu de sidra en Galicia son dos grandes desconocíos pal públicu en xeneral. La sidra bebíase antaño en Galicia —tradición documentada claramente na bibliografía, escasa pero contundente— y caltúvose como bebida popular hasta anguaño, principalmente nes zones non vinícoles, como la comarca interior alta d’A Estrada (Pontevedra).
Galicia ye tierra d’abondancia y, a pesar de la dureza del trabayu na tierra y de les adversidaes del clima, la naturaleza prémianos cíclicamente con arrogancia, xorreciendo y dando frutos toles primaveres.
Apuéstase por una forma d’ellaboración tradicional y artesanal, pero con toles garantíes de la industria de calidá.
La sidra gallego ta venceyao a dos conceptos, terra y orixe, y la mayor parte ellabórenlo productores pequeños, porque esto-yos da lllibertá pa crear, anovar y reinventar.
El mercáu necesita una fruticultura autóctona na busca d’esos sabores auténticos, y los productores gallegos son optimistes no que cinca a esta revolución agroalimentaria gallega, porque los sos protagonistes lleven por bandera tres valores bien sólidos: la ilusión, el convencimientu y la constancia.
La mazana, signu de salú y llonxevidá, ye la fruta por escelencia del territoriu de la sidra vasco, onde too ta venceyao a esta bebida: historia, cultura, economía, vezos, formes de vida, ritos, etc.
Agora tienes la oportunidá de conocer esti patrimoniu fantásticu y de compartilu con nós. Ven y conoz les nuestres fiestes, sableres, ciudaes, museos, gastronomía, montes, tradiciones…
Descubri los nuestros secretos aprendiendo les pallabres máxiques de la nuestra llingua milenaria, l’eusquera, que llate con fuerza nel corazón del territoriu de la sidra vasco.
Ven y disfruta del territoriu de la sidra na so dimensión humana. Txotx!